දැන් ඉතින් ඉස්‌සර වගේ නෙමෙයිනේ...දන්නැද්ද...?

අලුත් ජීවිතේ කොහොමද?
-අයෝධ්‍යා
දැන් ඉතින් ඉස්‌සර වගේ නෙමෙයිනේ...දන්නැද්ද...?
-ප්‍රතිභා
අයෝධ්‍යාට ප්‍රතිභාව හමුවෙන්නේ මීට වසර හතර පහකට ඉහතදී. ඒ සිහින පුරය ටෙලි නාට්‍යයේ රූගත කිරීම්වලදී. එදා සිහිනපුරයේ ටෙලියේදී බැඳුණු අයෝධ්‍යා සහ ප්‍රතිභාගේ මිතුදම අදටත් අඩුවෙලා නැහැ. ප්‍රතිභා නිතරම කියනවා කියන්නේ අයෝධ්‍යා එයාගේ නංගි කෙනෙක්‌ වගෙයි කියලා. මේ දෙන්නගේ තියෙන ගජමිතුදම නිසාම අපි මෙදා පාර හිතමිතුරු සුළඟට ඔවුන්ව එකතු කරගන්න හිතුවා. අනිතමේ අයෝධ්‍යා ඉදිරිපත් කළ ප්‍රශ්න පත්‍රයට ප්‍රතිභා මෙලෙස පිළිතුරු දුන්නා.
Ö කාලෙකින් දැක්‌කේ නැහැනේ...
ඔව් නේද?. අපේ වෙඩින් එකෙන් පස්‌සේ තවම ඔයාව මාත් දැක්‌කේ නැහැනේ.
Ö මේ දවස්‌වල මොනවාද කරන්නේ ?
ගෙදර තමයි ඉන්නේ. වෙඩින් එකෙන් පස්‌සේ මාස තුනකට විතර ෂූටින් නැවැත්තුවා. අනික මගේ රූගත කළ ටෙලිනාට්‍ය කිහිපයක්‌ විකාශනයවීමට තියෙනවා.
Ö රඟපෑම එපාවෙලාද?
අයියෝ නැහැ. මේ දවස්‌වල මම ඩොක්‌ටර් සරච්චන්ද්‍රගේ කදා වළලු වේදිකා නාට්‍ය සමග රටවටා යන්න වෙලා තියෙනවා. තව මේ මාසයේ අන්තිම විතර මම මුලින් දායක වුණු දිය බින්දුවක්‌ ටෙලිනාට්‍යයේ ඉතිරි කොටස්‌ කිහිපයේ රූගත කිරීම්වලට දායකවෙන්න තියෙනවා. කොහොටමත් මේ මාසේ අන්තිම තමයි වැඩපටන් ගන්නේ.
Ö විවාහ ජීවිතය එහෙම කොහොමද?
වරදක්‌ නැහැ. සුන්දරයි. දැන් ඉතිං ඉස්‌සර වගේ නෙමෙයි. තමන්ගේම කියලා සහකරුවෙක්‌ ඉන්නවිටදී ලොකු ආරක්‍ෂාවක්‌ දැනෙනවා. ඒ වගේම කවුරු හරි ළඟ ඉන්නවා කියලා දැනෙනවා. එවිට ලොකු සතුටක්‌ දැනෙනවා.
Ö සැමියා සමග සිංගප්පූරු ගියා කියලත් ආරංචියි ?
ඔව්. ඒ ගමන් ගිහින් දැන් ගොඩක්‌ කල් වෙනවානේ.
Ö ඒ ගමන හොඳයිද?
වදරක්‌ නැහැ. අපි දෙන්නා හොඳට විනෝදවුණා.
Ö වැඩිපුර කැමැති රංගනයටද?. රැකියාවටද?
දෙඅංශයටම කැමැතියි. මගේ තාත්තා කලාකරුවෙක්‌ හින්දා අපේ ගෙදර නිතර කලාකරුවෝ ගැවසෙනවා. අනික මම ඉගෙනගත්තු දේ අහකදාන්නත් බැහැ. ඒක හින්දා කලාවයි, රැකියාවයි දෙකම සමබරව කරගෙන යනවා.
Ö රංගන ජීවිතයට සැමියාගෙන් ලැබෙන්නේ මොනවගේ සහයෝගයක්‌ද?
ලොකු සහයෝගයක්‌ ලැබෙනවා. එයත් කලාවට කැමැතියි. මම සමහර වෙලාවට කම්මැලියි. එයා තමයි මාව උනන්දු කරවන්නේ.
Ö මෙතෙක්‌ කල් රඟපෑ චරිත අතුරින් වැඩිපුරම කැමැති චරිතය?
චරිත කිහිපයක්‌ම තියෙනවා. ඒ අතුරින් සුවිශේෂ චරිතය මම ඔයාට කියන්නම්.
Ö හා කියන්නකෝ බලන්න...
2012 මම හොඳම සහාය නිළිය විදිහට සම්මාන තුනක්‌ ගන්නවා. ඒ චරිතය මට සුවිශේෂයි.
Ö මොකක්‌ද ඒ චරිතය?
සැණකෙළියයි මායා නාට්‍යයේ වින්දි කියන චරිතය.
Ö ඉදිරියට රඟපාන්න කැමැති චරිත එහෙම තියෙනවාද?
එහෙම කියන්න තරම් සුවිශේෂී චරිත නැහැ. චරිතයක්‌ ලැබුණහම එහි පිටපත කියවලා බලලා හොඳනම් භාරගන්නවා.
දැන් පදිංචිය එහෙම කොහෙද?
මාලඹේ. ඇයි අමතකද?.
අනේ නැහැ.
ඔයාට මම කිව්වනේ, අපේ අලුත් ගෙදර එන්න කියලා.
Ö අම්මා, තාත්තා බලන්න එහෙම ගියාද?
හැම තිස්‌සේම යනවා. මම කොහොමටත් සතියකට දවස්‌ තුනක්‌ හතරක්‌ අපේ අම්මයි, තාත්තයි වගේම සැමියාගේ අම්මයි, තාත්තයි බලන්න යනවා. ඔය ටික කරන්න ගියහම වෙලාවක්‌ තිබුණොත් විතරයි අපේ ගෙදර ඉන්න වෙන්නේ.
Ö දේශපාලනයට ආරාධනාවක්‌ ලැබුණොත් භාරගන්නවාද?
අනේ අම්මෝ නැහැ. මගේ තුන්හිතකවත් දේශපාලනයට එන්න අදහසක්‌ නැහැ.
Ö වරමක්‌ ලැබුණොත් මොනවාද කරන්නේ ?
හැමදාම මට මගේම අම්මා තාත්තා ලැබෙන්න කියලා තමයි ප්‍රාර්ථනා කරන්නේ.
Ö ඔබ ගොඩක්‌ සුන්දර යුවතියක්‌. නිරූපණයට එන්න අකමැතිද?
මගේ එතරම් කැමැත්තක්‌ නැහැ.
Ö ඇයි ඒ ?
ඕනෑම දෙයක්‌ කරන්න කෙනෙකුට හැකියාවක්‌ තියෙනවා. මට නිරූපණයට හැකියාවක්‌ නැහැ කියලා හිතෙනවා. නිරූපණයට මට ටැලන්ට්‌ එකක්‌ නැහැ.
Ö රංගන ශිල්පිණියක්‌වීම ගැන මොකද හිතන්නේ ?
ලොකු සතුටක්‌ තියෙනවා. මිනිස්‌සුන්ව පිනවීම කියන්නෙත් එක්‌තරා අයුරකින් ලොකු පිනක්‌. අනික කලාව කියන්නේ සේවයක්‌.
Ö මං වාගේ යාළුවෙක්‌ හමුවීම ගැන මොකද හිතන්නේ ?
අම්මෝ ඇත්තටම හරි සතුටුයි. ඔයා මගේ නංගි කෙනෙක්‌ වගෙයි. ඒ වගේම ඔයාට හොඳ රංගන හැකියාවක්‌ තියෙනවා.
දිනේෂ් විතාන